कणा कविता , कवी - वि . वा . शिरवाडकर

कणा कविता

 'ओळखलंत का सर मला' पावसात आला कोणी

कपडे होते कर्दमलेले केसावरती पाणी

क्षणभर बसला , नंतर हसला , बोलला वरती पाहून

'गंगामाई' पाहुणी आली . गेली घरट्यात राहून

माहेरवाशीण पोरीसारखी चार भिंतीत नाचली

मोकळ्या हाती जाईल कशी- बायको मात्र वाचली

भिंत खचली , चूल विझली , होते नव्हते नेले ,

प्रसाद म्हणून पापण्यांमध्ये पाणी थोडे ठेवले

कारभारणीला घेऊन संगे सर आता लढतो आहे 

पडकी भिंत बांधतो आहे , चिखलगाळ काढतो आहे

खिशाकडे हात जाताच हसत हसत उठला 

पैसे नको सर , जरा एकटेपणा वाटला

मोडून पडला संसार तरी मोडला नाही कणा

पाठीवरती हात ठेवून नुसते लढ म्हणा .

- कुसुमाग्रज

https://ansnews24taas.blogspot.com/2023/08/blog-post_12.html